Coruña

Apresentaçom da publicaçom ‘O Direito a Decidir: Situaçom actual e alternativas à despenalizaçom do aborto’ e colóquio ‘Tecendo redes para conseguirmos o direito a decidir sobre o nosso corpo’

Este encontro do tecido associativo da nossa cidade terá lugar na quinta-feira, 7 de Maio no Centro Social Atreu da Corunha (Rua Sam José, 2, rés-do-chão. Bairro de Montealto – Corunha)

Na passada sexta-feira, 24 de Abril, tivo lugar a palestra ‘Coeducaçom afectivo-emocional e sexual da perspectiva de género’ a cargo de Lola Ferreiro. Mulheres da nossa cidade partilhámos informaçom, inquietudes e estratégias de acçom socio-política em defesa dos direitos sexuais e reprodutivos na nossa sociedade. Falámos da primeira lei de aborto na Catalunha em 1937, em que a mulher era atendida depois de 8 dias da primeira consulta, nas dispensarias (antigos centros de atençom primária) e onde a objecçom de consciência no pessoal médico estava regulada, garantindo assim a atençom sanitária da mulher na sanidade pública. Nessa altura nom era permitido e mesmo se penalizava a prática de abortos em consultas privadas.

A sexualidade é algo com o qual nascemos e a sua aceitaçom e normalizaçom na nossa vida desde crianças é fundamental para desenvolver umha vida sexual e emocional livre e satisfatória, e portanto a inclusom no currículo escolar da educaçom afectivo-emocional e sexual tem de ser umha demanda chave dentro de qualquer lei de aborto.

Com respeito às infra-estruturas sanitárias concordou-se que som insuficientes e inadequadas para as necessidades das mulheres, e em muitos casos as disposições legais de atençom específica para a mulher, que deveria estar normalizada nos centros de saúde, nom estam sendo cobertas.

Para o bom funcionamento dum sistema educativo e sanitário que garanta ‘o direito da mulher a decidir livre e responsavelmente o número de filhas e filhos, e o espaço de tempo entre os nascimentos’ assim como ‘adoptar as suas decisões em matéria de reproduçom sem sofrer discriminaçom, coacções nem violência’, tal e como foi disposto na Conferência do Cairo em 1994, é imprescindível que se ponham os meios educativos e sanitários adequados incluindo infra-estruturas e umha formaçom qualitativa do pessoal educativo e sanitário da perspectiva de género e com assessoramento continuado.

Conclui-se sobre a necessidade de trabalharmos todas as mulheres juntas: propiciar um diálogo entre todas as feministas do país e criar e fortalecer laços de comunicação e entendimento com a sociedade em geral com o fim de exercer pressom social e influir nas políticas da Galiza e do Estado.

As mulheres queremos umha lei de aborto que reconheça o nosso direito a tomar decisões livres e responsáveis e que garanta a saúde sexual e reprodutiva de todas as mulheres sem discriminaçom geográfica e na Sanidade Pública.

‘Entón, que significa para nós isto de sentirnos queridas?…probabelmente se pode resumir nunha secuencia do estilo:«sentímonos tidas en conta – respectadas – valoradas/admiradas – importantes ou, mellor aínda, fundamentais ou mesmo únicas para os demais»…porque todo isto fainos sentir «alguén» – respectábel – valorábel/admirábel – importante/fundamental/única»…e cando isto sucede sentímonos satisfeitas e felices, e motivadas para estabelecer novas relacións con outras persoas…e se isto é así a maior parte das veces, aprendemos a nos querer a nós mesmas e acadamos un nivel de confianza e de seguridade que mesmo nos permite superar con éxito as experiencias negativas cando estas se producen.’

Fragmento do libro ‘Coeducación afectivo-emocional e sexual’ do Grupo Lúa Crecente

 

A coordenadora comarcal da MMM na Coruña organiza para este venres 24 de Abril a presentación da publicación ‘O dereito a decidir: Situación actual e alternativas á despenalización do aborto‘ xunto con a charla sobre a ‘Coeducación afectivo-emocional e sexual con perspectiva de xénero‘ a cargo de Lola Ferreiro, catedrática de saúde, membra do Grupo Lúa Crecente, enfocado na educación para a saúde desde a perspectiva de xénero, e coordinadora da publicación ‘Coeducación afectivo-emocional e sexual‘.

O acto terá lugar ás 20:00 horas na Asociación Cultural Alexandre Bóveda da Coruña (Rúa dos Olmos 16-18 1º andar).

Para mais información contactar con marchacorunha@gmail.com

Links para baixar libros de Lola Ferreiro:

http://sgi.xunta.es/document/coeducacion.pdf

http://www.xunta.es/auto/sgi/document/estudocoeduc.pdf

‘A modo de dato, segundo recollía a memoria do fiscal do Tribunal Supremo no ano 1964, en España practicábanse naqueles momentos—falo de só uns cantos anos antes do 1978—uns 300.000 abortos clandestinos feitos nas peores condicións sanitarias. Feitos por afán de lucro, e que moitas veces acababan coa vida da muller embarazada. Falo de 300.000 nuns anos, no 1964, cunha política claramente pronatalista, e en consecuencia as familias, evidentemente, tiñan moitos máis fillos que agora. Falamos dunha cifra, 300.000 abortos, que considero exemplifica que os abortos se cometían aínda non habendo unha lei, que para determinados sectores, “anima“ ás mulleres a abortar.’
                 Fragmento de ‘O Direito a Decidir: Situación Actual e Alternativas à Despenalización’

A Marcha Mundial das Mulleres na Galiza iniciamos en Xaneiro de 2008 a campaña polo aborto libre e gratuíto na Seguridade Social, coa recollida de autoinculpacións en que participaron mais de 1500 mulleres e homes do noso país, manifestacións e acto de entrega de autoinculpacións no día 8 de Marzo Día internacional das  Mulleres.
Continuando con esta campaña e conmemorando o 28 de Maio Día Internacional de Acción pola Saúde das Mulleres a coordinadora comarcal da Coruña organizou un ciclo de conferencias, vídeo-forum e coloquios baixo o título ‘O dereito a decidir: Situación actual e alternativas à despenalización do aborto’. Nas xornadas introducíronse temas tais como a loita polos dereitos reprodutivos e sexuais, a situación actual e redes dos COF (Centros de Orientación Familiar), os aspectos legais do dereito a decidir, e coa colaboración de mulleres representantes do asociativismo e activismo da nosa cidade xerouse un debate sobre as alternativas à despenalización do aborto.
Coa publicación destas xornadas e a súa divulgación totalmente gratuíta tanto en papel como en formato electrónico, pretendemos partillar con todas a información, debate e reflexión que xurdiu dentro da dinámica desta actividade. Consideramos que este material pode axudar a entender mellor o contexto histórico, xurídico e sanitario da actual regularización do aborto e estabelecer as bases para a discusión dentro da sociedade galega das alternativas à despenalización. Para a Marcha Mundial das Mulleres é fundamental deseñar estratexias de presión social e política e encoraxar a participación de toda a sociedade e do activismo galego nestas estratexias.

Até todas as mulleres do mundo conseguirmos a soberanía sobre o propio corpo, nós continuaremos en marcha.