No próximo ano a Coordenadora Galega da Marcha Mundial das Mulleres cumple vinte e cinco anos de historia construíndo un feminismo de base, anticapitalista, antirracista e antiimperialista na Galiza. Ao longo destes anos contribuímos para a construción dun feminismo galego centrado no país, forte, con capacidade de incidencia social e con voz de seu no mundo en pé de igualdade co resto de pobos. 

Pensando na organización deste ano de celebración e reivindicación realizaremos este Encontro Nacional para pór en común ideas, axendas e propostas de cara a 2025, ano no que tamén decorrerá a nivel internacional a nosa V Acción Internacional.  

Para estes traballos convocámonos ao Encontro Nacional “En Marcha até que todas sexamos libres” que realizamos o 14 de decembro en Compostela e que queremos compartir con aquelas compañeiras e aliadas que queiran acompañarnos. 

• Os 25 anos da Marcha na Galiza.
• Retos para o presente e o futuro.
• 25 aniversario, un ano para relanzar o proxecto.
• Enfrontar as violencias machistas na Galiza de hoxe.
• Despedida. recollida de acordos e peche do encontro.